ATUQWAN AŚNU

Huk hunaqśi pampaćhaw qiwakta mikur huk aśnu kaykarqan. Ćayćhaw kaykaptinśi huk atuq ćayman ćharqan. Ćhaykurśi aśnukta ñirqan: -Imanawllataq kaykanki, ata rinri cumpä?
Ćaynaw ñiptinśi aśnuqa ñirqan: -Däñukunäpaq pirqakta saltaśqäćhawmi wallanka kaśakta haruykuśkä, cumpä. Ćaywanmi puriytapis kamäpaküću.
Ćaynaw willaparkurśi aśnupis atuqta tapurqan: -Qamqa, imanawllataq kaykanki ćhakćha rinri cumpä atuq?
Ćaynaw ñiptinśi atuqqa ñirqan –Imaktapis mikunäpaq mana tarirmi paćaypa mikanaś puriykä, cumpä.
Uyśallapis wallpallapis kaptiykiqa qamta maynami mikurkümanña, cumpä.

Ćaymi aśnu ñirqan: -Tayta kaśu sinqa atuq, malaganaypiqtaqa awantashwanmi. Kay nanaytami ićanqa pipis awantanmanću. Manaćuraq kay qipa ćhakïpiqta kaśakta hurqapaykamankiman? Qampaqqa pi-maypis parlan alli doctor kaśqaykiktami. ćaynaw kaykarqa ćhakïćaw kaykaq kaśakta hurqapaykallämay, ari.

Aśnu ćaynaw alabaptinśi atuqqa kuśikur ñirqan: -Llapan atuq-mayïkunapiqtapis ñuqaqa mas yaćhaq doctormi kaykä.

Ñirkurñaśi atuqqa llullapaykaśqanta mana tantyakuypa aśnupa ćhakinta huqarkur kaśakta aśtipänanpaq aśipaykarqan. Ćaynaw aśipaykaptinśi aśnuqa śumaq asirtaykur llapan kallpanwan śimićhaw haytaykurqan llapan kirunpis śuśuqpaq. Ćaynaw haytaykuptinśi atuqqa wikapakayparaq pampaman aywarqan ñawinpis tikrakaqpaq. Ćaynaw haytariykurśi aśnuqa sikinta hita-hitarkur “Häćhun, häćhun, häćhun!” ñir aywakurqan. Atuqñaśi wañuyta ñakar ćayćhaw quśpaykar këdakurqan.

Yaćhaćikuy: Pipis alabaśuptiyki ama llapantaqa criyiyću.